نزف دم

 أوراق مكتوبة .. وخط الإيد مهزوز م الألم
وفيه مجموعة ورق .. من كتر الركنة اتردم
تفاصيل يومية .. مافيهاش غير أحداث عادية 
وورق تشخيص مليان بكلام .. بس التلخيص
بيقول الحالة أكيد صعبة .. .
ومافيش لعلاجها .. أي أمل ولا حتى بصيص
العِلم وقف عاجز محتار .. إنهار
قدام الدم إللي بيجري زي الأنهار 
لكن رغم سواد المشهد .. كان عندها إصرار .. بيزيد
يمكن يوم هتلاقي علاج وهايبقى مفيد ..
تفتح صفحة حظ اليوم .. تسأل عن رأي الأبراج أو رأي نجوم..
واحدة بواحدة حفظت كل كلام متعاد ...
واحدة بواحدة لقيت إن وجعها ... زاد ..
وكأنها عايشة في مزاد ..
مين يستهلك وقتها أكتر؟
فضلت بتدور تستفسر .. يمكن تقدر تلقى علاج
الموضوع مابقاش رفاهية .. ده ضرورة .. واحتياج
وضعها وسط أصحابها .. عيلتها .. أصبح صعب 
بقيت عالة عليهم ... رغم ألمها وحالها الكرب
ولا حدش فاكر يسألها عن أخبارها ..
ليلها بقى يشبه لنهارها..
حتى لما تقرر يوم تنزل ع المجمع ..
علشان تسمع .. كلمة تشجعها تعزيها..
تلقى شريعة بتشاور علشان تخزيها ..
وتحطها وسط النجسين ..
علشان نزف الدم بيعلن علامات موت ..
تاخد جنب وتقعد تبكي وسط سكوت ..
والنظرات مليانة تحقير ..
وتزيد أوجاعها بكتير ..
ترجع بيتها تقرر تكتب آخر ورقة ..
بكلمات صادقة ..
أنا قررت خلاص أتوقف عن أي محاولات للشفا ..
اخترت طريق الاِكتفا ..
متأسفة .. عن كل محاولة ومبادرة ..
أنا مش قادرة ..
آخر حاجة بأتمناها .. ألقى محبة قبل علاج ..
ألقى حد يرحب بيَّ .. حد يقدَّر الاحتياج ..
هل يا ترى هالاقيه موجود؟؟
ولا الباب مقفول مسدود؟؟

الشجاعة

يعني إيه تكون شجاع؟
الموضوع مش بالدراع
الشجاعة يعني رغبة إنك تطرد أي خوف
إن قولة الحق تبقى واضحة دايمًا ع المكشوف
إنك تبقى في ضهر خايف
إنك تبقى بعينك شايف
إن الخوف بيبني سد... أو سدود
بيخليك مزنوق ودايمًا عينك باصة ع المحدود

الشجاعة في الكلام
الشجاعة في العمل
الشجاعة يعني بكرة جاي أكيد ومعاه أمل
الشجاعة عدو واضح لأي حسرة وانهزام
الشجاعة إلتزام
الشجاعة اهتمام

الشجاعة في المبادرة
الشجاعة دايمًا حاضرة
الشجاعة في المخاطرة
مش تهور ... لأ تطور
الشجاعة في النضوج
الشجاعة مش بتسكن قصر عالي أو بروج

الشجاعة في المواجهة
الشجاعة طريق ووجهة